الخط اللي بيفضل باين حصري لموقع لمحه

رسالة كانت من دقيقة واحدة بس.. أرجوكي ردي.. أنا في ورطة.. محتاجاكي تيجي البيت حالا
استغربت.. ورطة إيه؟ دي لسه من ساعة كانت بتضحك وبتقول لي يمكن تبطلي تبقي أنانية
كلمت السواق يرجعني البيت.. طول الطريق قلبي مقبوض
وصلت البيت.. لقيت الباب مفتوح.. وماما قاعدة على الكنبة بتعيط.. وبابا واقف في نص الصالة وشه أحمر.. وأختي قاعدة على الأرض جنب كمان جدي المكسور.. بتعيط بهيستيريا
أول ما شافتني.. قامت جريت عليا ومسكت إيدي وقالت سامحيني.. سامحيني.. أنا مكنتش أعرف
قلت مكنتيش تعرفي إيه؟
بابا قال بصوت عالي الزفت الكمان اللي كسرتيه ده.. تمنه 20 ألف دولار.. 20 ألف دولار.. انتي عارفة يعني إيه؟ يعني تمن عربية.. وانتي كسرتيه عشان فستان؟
ماما قالت مش الفلوس بس.. ده كمان أبوها.. أبوها اللي مات.. اللي كان بيحبها أكتر واحدة
أختي قالت وهي بتعيط أنا مكنتش أعرف انه غالي كده.. كنت فاكراه كمان عادي من اللي بيتباع في المحلات.. والنبي سامحيني.. قولي لهم انك مسامحاني.. بابا بيقول هيخليني اشتغل طول الصيف عشان أسدد تمنه.. وهياخد مني الفستان وكل هدومي الجديدة
بصيت لها.. لقيتها لابسة الفستان.. نفس الفستان اللي اتخانقنا عليه.. الفستان اللي كسرت عشانه كمان جدي
الفستان كان ضيق عليها.. ومش لايق عليها أصلا.. وكانت شكله عبيط وهي قاعدة على الأرض بتعيط بيه
قلت لها قومي
قامت
قلت اقلعي الفستان
اتصدمت وقالت إيه؟
قلت اقلعي الفستان اللي كسرتي عشانه كمان جدي.. اقلعيه حالا
بصت لماما وبابا.. محدش اتكلم
دخلت أوضتها وقلعت الفستان وجت لابسة بيجامة.. وجابت الفستان في إيديها
خدته منها.. ومسكت المقص اللي كان على الترابيزة.. وقصيت الفستان نصين.. قدام عنيها
هي صرخت وقالت انتي بتعملي إيه؟ ده تمنه 200 دولار
قلت وانتي كسرتي حاجة تمنها 20 ألف.. يبقى احنا خالصين.. ولا إيه؟
سكتت
قلت الكمان ده مش هيرجع.. حتى لو صلحتيه.. هيفضل مكسور.. زي ما جدي مات ومش هيرجع.. بس انا هقولك حاجة.. انا مش هخليكي تدفعي 20 ألف.. ولا هخلي بابا ياخد هدومك
بصت لي مستغربة
قلت أنا هخليكي تعملي حاجة أصعب.. هتيجي معايا كل يوم لمدة شهر.. الورشة اللي بتصلح الكمان.. هتقعدي جنب الراجل وهو بيصلحه.. وتشوفي بياخد وقت قد إيه.. وبيتعب قد إيه.. عشان ترجعي حتة خشب انتي كسرتيها في ثانية.. وكل يوم هتكتبي جواب لجدي.. تعتذري له.. حتى لو هو ميت.. عشان هو اللي علمني ان الكمان مش خشب.. الكمان روح
أختي قعدت تعيط تاني.. بس المرة دي عياط مختلف.. عياط ندم بجد
قالت موافقة.. موافقة على أي حاجة
ماما قالت وانتي؟ الحفلة؟ عزفتي بإيه؟
قلت وانا ببص للعلبة اللي فيها الكمان الغالي عزفت بحاجة هي عمرها ما هتفهمها.. عزفت بحاجة بتتأمن للي بيحافظ.. مش للي بيكسر
ومن ساعتها.. كل يوم.. بنروح الورشة سوا.. هي بتتفرج.. وانا بتفرج.. والراجل بيصلح كمان جدي.. حتة حتة.. بقالنا 3 أسابيع.. ولسه مخلصش.. وهي كل يوم بتكتب جواب.. وتحطه جنب الكمان المكسور
وآخر جواب كتبته كان يا جدو.. أنا آسفة.. مكنتش أعرف ان الحاجة اللي بتتكسر في ثانية.. بتاخد شهور عشان تتصلح.. وبتفضل معلمة طول العمر
وكملنا على الحال ده شهر كامل.. كل يوم الساعة 4 العصر.. ناخد المترو ونروح ورشة عم سيد اللي في العتبة.. الورشة ضيقة وريحتها خشب وغرا.. وفيها كمانات متعلقة من السقف كأنها جث مستنية تتدفن
عم سيد راجل عنده 70 سنة.. إيده بتترعش بس عينه زي الصقر.. أول ما شاف كمان جدي المكسور.. قال جملة واحدة مين ابن ال.. اللي عمل كده في التحفة ده؟
مرضتش أرد.. أختي وشها جاب ألوان
قال ده خشب عمره 60 سنة.. الخشب ده اتقطع من شجرة ماتت من 100 سنة.. مينفعش يتكسر كده
بدأ يشتغل.. كل يوم حتة.. يفك الحتة المكسورة.. يصنفر.. يلزق.. يشد الوتر.. يجرب.. يفك تاني
وأختي قاعدة على كرسي خشب صغير جنبه.. ساكتة.. بتتفرج.. وأنا قلت لها تكتب الجواب وهي قاعدة هناك.. عشان تحس
في أول أسبوع كانت بتكتب كلام عبيط زي آسفة يا جدو.. مش هعمل كده تاني كلام عيال
في تاني أسبوع بدأت تكتب بجد.. مرة كتبت يا جدو.. أنا طول عمري فاكرة ان الحاجات بتيجي بسهولة.. عايزة فستان.. بعيط.. باخده.. عايزة أوضة.. بزن.. باخدها.. أول مرة أطلب حاجة وحد يقول لي لأ.. معرفتش أستحمل.. فكسرت اللي قدامي.. مكنتش بكسّر كمان.. كنت بكسّر كلمة لأ
لما قريت الجواب ده.. عيطت.. أول مرة أحس انها فهمت
في تالت أسبوع.. حصلت حاجة غيرت كل حاجة
كنا قاعدين في الورشة.. وعم سيد بيجرب يركب حتة خشب جديدة مكان اللي اتكسرت.. وفجأة دخل علينا راجل لابس بدلة غالية.. ومعاه شنطة جلد
سأل فين الكمان ال 1718؟
أنا اتنفضت.. محدش يعرف عن الكمان ده غيري أنا والمايسترو والست رئيسة المؤسسة
قلت انت مين؟
قال أنا المحامي بتاع مؤسسة الفنون.. الست بعتتني عشان آخد الكمان.. فيه حفلة مهمة في دار الأوبرا بعد 3 أيام ومحتاجينه
قلت بس الكمان معايا.. المفروض يفضل معايا لحد آخر الموسم
قال حصل تغيير.. فيه عازفة تانية جاية من بره.. وهتعزف بيه.. الست قالت انك خلاص استخدمتيه في أهم حفلة.. ولازم يرجع
حسيت ان الأرض بتلف بيا.. الكمان ده كان الحاجة الوحيدة اللي مصبراني على كسرة كمان جدي.. كنت كل ما أزعل.. أروح الأوضة المتأمنة وأبص عليه
أختي بصت لي وقالت كمان إيه أبو 9 مليون ده؟
سكت..