اخوكي محتاج بنزين حصري لموقع لمحه

السكة
بعدها بساعة.. تليفوني مبطلش رن.. أخويا.. بابا.. خالتي.. كلهم بيكلموني.. أخويا بيشتم.. انتي فاكرة نفسك مين؟.. انتي اللي هتحاسبينا؟.. ده انتي لولانا مكنتيش كبرتي
بابا بيقول عيب يا بنتي.. أمك بتعيط.. عشان 25 دولار هتخسري عيلتك؟
مردتش على حد.. عملت بلوك مؤقت لكل الأرقام.. ورحت جبت بنتي من المدرسة بدري.. خدتها وروحنا جبنا لبس جديد.. وجبنا جزمة جديدة مقاسها.. وروحنا سوبر ماركت.. وقلت لها نقي اللي انتي عايزاه
كانت ماشية بتحضن الكيس.. وخايفة تطلب حاجة غالية.. قلت لها يا حبيبتي اطلبي.. ده فلوسك انتي.. اللي ماما كانت بتاخده.. رجع لك
بالليل.. فتحت اللاب توب تاني.. ولغيت الكارت بتاعي من كل حاجة تخصهم.. لقيت اني كنت بدفع لهم 487 دولار في الشهر سوبر ماركت.. غير فواتير النور والنت.. يعني حوالي 700 دولار كل شهر.. بقالي 18 شهر.. يعني أكتر من 12 ألف دولار.. وانا كنت فاكرة نفسي بساعدهم ب 25 دولار
12 ألف دولار.. كنت أقدر أجيب بيهم لبنتي أوضة جديدة.. كنت أقدر أدخلها نادي.. كنت أقدر أرتاح شوية ومشتغلش شفتين
بس خلاص.. اتعلمت
تاني يوم.. المدرسة كلمتني.. قالت لي بنتي أكلت وجبتين.. واحدة الصبح وواحدة الضهر.. وكانت مبسوطة أوي.. وقالت لصاحبتها ماما رجعت لي الكارت
وفي نفس اليوم.. ماما بعتت لي رسالة من رقم غريب.. كاتبة حتى لو قطعتي الفلوس.. هتفضلي بنتي.. وأنا مسامحاكي عشان انتي مضغوطة.. بس أخوكي محتاج شغل.. لو لقيتي له شغل قولي لي
مردتش
عشان فهمت حاجة مهمة أوي الليلة اللي بنتي قالت لي فيها انها سرقت بسكوت.. ان العيلة مش بالدم.. العيلة باللي بيفتكرك جعان ولا شبعان.. باللي بيفتكر بنتك كلت ولا لأ.. مش باللي بياخد أكلها ويديه لابنه ويقولك متكبريش الموضوع
ومن ساعتها.. كل يوم أحد.. بقيت آخد بنتي ونروح المدرسة سوا.. أحط لها الفلوس بإيدي.. وأبوسها.. وأقول لها كلي كويس يا قلب ماما.. فلوسك بقت ليكي انتي بس
وبنتي.. بطلت تاكل نص ساندوتش صاحبتها.. بقت هي اللي بتقسم ساندوتشها مع صاحبتها.. عشان اتعلمت مني.. ان اللي معاه أكل.. لازم يأكل اللي حواليه.. مش يسرق أكلهم
عدى أسبوع على خناقة ال 25 دولار.. أسبوع كامل وأنا عاملة بلوك لعيلتي كلها.. كنت فاكرة الموضوع هينتهي.. انهم هيزعلوا شوية وبعدين هينسوا.. بس اللي حصل بعد كده كان أوسخ بكتير من موضوع الأكل
يوم الجمعة.. كنت قاعدة مع بنتي بنذاكر.. الباب خبط.. فتحت لقيت أخويا واقف قدامي.. لأول مرة ييجي بيتي من 8 شهور.. من ساعة ما اتخانقنا آخر مرة عشان كنت بقوله دور على شغل
دخل من غير ما أقول له اتفضل.. وقعد على الكنبة كأنه صاحب البيت.. وبص لبنتي وقال اطلعي أوضتك يا حبيبتي.. عايز أتكلم مع ماما كلمتين
بنتي بصت لي.. قلت لها ادخلي أوضتك يا قلب ماما.. دخلت وقفلت الباب.. بس سابت حتة صغيرة مفتوحة.. كنت شايفاها بتبص
أخويا قال بصي بقى.. احنا مش هنقعد نلف وندور على بعض.. انتي قطعتي عننا الفلوس.. ماشي.. انتي حرة.. بس ماما تعبانة.. وضغطها عالي بسببك.. وبابا مش عارف يدفع فاتورة النور.. وده كله عشان 25 دولار بتوع بنتك؟.. انتي بقيتي أنانية أوي
قلت له أنا أنانية؟.. انت عندك 34 سنة.. قاعد في بيت أبوك وأمك.. بتاكل ستيك وكابوريا بفلوسي.. وبتروح الجيم بفلوسي.. وبتجيب بلايستيشن بفلوسي.. وأنا اللي بشتغل 60 ساعة.. وأنا الأنانية؟
ضحك ضحكة مستفزة وقال آه انتي الأنانية.. عشان انتي معاكي فلوس ومش عايزة تدي أهلك.. انتي ناسية ان ماما هي اللي ربتك؟.. ناسية ان بابا هو اللي صرف عليكي لحد ما اتجوزتي واتطلقتي ورجعتي بعيال؟
الكلمة وجعتني.. رجعتي بعيال.. كأني عالة.. كأني شحاتة.. مع اني من يوم ما اتطلقت وانا مش واخدة جنيه من حد.. أنا اللي بدي
قلت له اطلع برا
قال مش طالع غير لما ترجعي الكارت.. وترجعي ال 25 دولار.. وتبطلي شغل العيال الصغيرة ده
قلت له مش هرجع حاجة.. والكارت اتلغى.. ولو ممشيتش دلوقتي هكلم البوليس
قام وقف.. وبص لأوضة بنتي.. وقال بصوت عالي عشان تسمع بقولك ايه.. خلي بنتك تتعلم الأدب.. عشان اللي بتعمليه ده هيخليها تطلع أنانية زيك.. ومحدش هيحبها.. زي ما محدش بقى بيحبك
بنتي طلعت تجري من الأوضة وحضنتني.. بتعيط.. قلت له اطلع برا يا حيوان
مشي.. بس قبل ما يمشي.. زق الترابيزة اللي عليها كتب بنتي.. الكتب وقعت على الأرض.. وبنتي صرخت
بعد ما مشي.. قعدت على الأرض ألم الكتب وانا بعيط.. بنتي بتقول لي هو خالو ليه بيكرهنا يا ماما؟
قلت لها مش بيكرهنا يا حبيبتي.. هو بيكره نفسه عشان مش عارف يبقى زينا.. مش عارف يشتغل ويتعب
خدتها في حضني وقلت لها بصي يا قلب ماما.. من النهاردة مفيش حد هيدخل بيتنا غير لما نقول له أهلا وسهلا.. بيتنا ده بتاعنا احنا بس.. اللي يحترمنا يدخل.. اللي ميحترمناش.. الباب مقفول في وشه
تاني يوم.. رحت المدرسة.. قابلت أم صاحبة بنتي الانتيم.. الست اللي بنتها كانت بتقسم ساندوتشها مع بنتي.. قلت لها شكرا ان بنتك كانت بتأكل بنتي
الست اتفاجئت وقالت هي بنتك قالت لك؟.. أنا بنتي بقالها أسبوعين بترجع تقول لي.. ماما صاحبتى جعانة.. ممكن أديها نص أكلي؟.. وأنا كنت بزود لها ساندوتش تاني عشان تديه لبنتك.. وكنت فاكرة انك انتي اللي موصياها تعمل