ليله الفرح اللي كشفت كل حاجه حصري لموقع لمحه

قضيت 3 سنين بعيط على جوزي.. وبعدين اتجوزت أخوه التوأم اللي شبهه بالظبط.. وفي ليلة فرحنا.. ندبة صغيرة خلتني أشك إن العيلة كلها عملت غلطة كبيرة من 3 سنين
جوزي الجديد كان بيغير هدومه جنب السرير لما لمحت الندبة.. ندبة صغيرة مقوسة تحت على شماله
جسمي كله اتجمد
أنا شفت الندبة دي قبل كده
سألته بهدوء جبتها منين دي؟
بص لتحت
وقال حادثة موتوسيكل.. من زمان
رده كان هادي
إنما ردي أنا مكنش هادي
عشان أخوه عمره ما ركب موتوسيكلات
لكن جوزي الأولاني كان عنده ندبة في نفس المكان بالظبط
وأنا عارفة عشان أنا كنت موجودة لما اتعور
الجزء الأول
أنا فقدت جوزي في 2019 بعد حادثة وحشة على الطريق السريع
وأخوه التوأم هو اللي فضل عايش
الاتنين كانوا شبه بعض لدرجة ان الناس كانت بتتلخبط بينهم
نفس الطول
نفس الشعر الغامق
نفس العينين البني
حتى صوتهم شبه بعض
بس بالنسبالي عمرهم ما كانوا زي بعض
جوزي كان بيملى أي مكان يدخله.. بيهزر على طول.. بيحب الاهتمام.. ويحول أي حاجة لمغامرة
إنما أخوه كان بيحب يسمع أكتر
هادي.. وبيفكر كتير.. وبياخد باله من الناس
بعد ما جوزي مات.. أخوه محاولش أبدا يبقى بديل لجوزي
هو بس فضل موجود
لما حنفية المطبخ باظت.. هو صلحها
لما مامته تطبخ أكل كتير.. كان يجيب لي منه
لما بنتي احتاجت حد يحضر حفلة في المدرسة وأنا مقدرتش أروح.. هو اللي راح
وواحدة واحدة بنتي حبته أوي
ومع الوقت.. ضد كل حاجة كنت متخيلاها.. أنا كمان بدأت أحبه
ولما اعترف لي انه هو كمان بيحبني.. اتخضيت
قلت له ازاي أعرف اني مش بختارك عشان انت شبه جوزي؟
اتضايق.. بس متخانقش
قال لي متعرفيش.. مش دلوقتي
وبعد كده بعد عني
قعدنا شهور بعيد عن بعض
والبعد ده علمني حاجة مهمة
أنا مكنتش مفتقدة الشبه
أنا كنت مفتقداه هو نفسه
فبعد 3 سنين من موت جوزي.. وافقت أتجوز أخوه
فرحنا كان صغير
العيلة والصحاب القريبين بس
ناس كانت بتتوشوش
وناس كانت بتبص
وأنا كنت مقدرة
حتى أنا ساعات كنت ببص له وأتوتر عشان شبه الراجل اللي صورته لسه محطوطة في أوضة بنتي
بس كنت فاكرة اني اتصالحت مع ده
لحد ليلة الفرح
بنتي كانت بايتة عند جدودها
ورجعنا البيت وبدأنا نجهز عشان ننام
كنت بقلع الحلق بتاعي وهو بيغير هدومه
وهنا شفت الندبة
صغيرة
مقوسة
قريبة من الحوض على الشمال
وفجأة مبقتش واقفة في أوضة نومنا
رجعت بذاكرتي لورا كذا سنة.. وأنا قاعدة جنب جوزي بعد ما اتعور في البيت
افتكرت وأنا بنضف له الجرح
وافتكرت وأنا بهزر معاه عشان كان بيقعد يشتكي كل مرة بغير له على الجرح
وافتكرت الندبة اللي سابتها في الآخر
نفس الندبة اللي جوزي الجديد شايلها دلوقتي
سألته جبتها منين؟
اتردد
ثانية واحدة بس
بس أنا لاحظت
حادثة موتوسيكل
بصيت له
موتوسيكل؟
آه.. من زمان
هزيت راسي ودخلت الحمام
وقفلت الباب عليا
أكيد فيه تفسير
التوأم ممكن يبقى عندهم ندب شبه بعض
يمكن أخوه اتعور مرة وأنا مسمعتش
بس كل ما حاولت أنسى الموضوع.. تفاصيل تانية بقت ترجع
أخوه ساعات كان بينده لبنتي ويقول لها يا دعسوقة
جوزي الأولاني هو اللي كان مخترع الاسم ده وهي بيبي
أخوه كان عارف بالظبط جوزي كان مخبي فلوس الطوارئ فين في بيتنا القديم
وكان عارف انهي ضلفة دولاب لازم تترفع سنة عشان تتقفل
ومرة لقى مفتاح أوضة بنتي الزيادة من غير ما يسألني كنا شايلينه فين
وكل مرة حاجة زي دي تحصل.. كنت بقول أكيد جوزي كان قايل له
ما هما توأم يعني
وكانوا بيشاركوا بعض في كل حاجة تقريبا
بس فيه تفصيلة تانية
المفروض ان أخوه عنده إصابة قديمة في معصمه الشمال من الكورة
جوزي مكنش عنده
ومع اني بقالي 3 سنين مع أخوه.. مش فاكرة اني شفت معصمه واجعه ولا مرة
رجعت الأوضة
سألني انتي كويسة؟
قلت له مرهقة بس
ابتسم
يوم طويل
نمت جنبه على السرير
وفي الآخر هو نام
أنا فضلت صاحية
حوالي الساعة 4 الفجر.. لفيت وبصيت له
نور القمر كان نازل على وشه
بقالي سنين بمرن نفسي اني أشوف أخوه لما أبص له.. مش جوزي
الليلة دي.. لأول مرة.. لقيت نفسي بعمل العكس
بقيت أدور في وشه على جوزي الأولاني
وبعدين افتكرت حاجة أخيرة
حاجة من الأيام اللي بعد الحادثة على طول
حاجة الدكاترة قالوها وكنت منهارة ساعتها لدرجة اني مسألتش فيها
قمت قاعدة مرة واحدة
هو اتحرك جنبي
مالك؟
مردتش
عشان فجأة الندبة مبقتش هي الحاجة الوحيدة اللي مش راكبة
ولأول مرة من 3 سنين.. لقيت نفسي بفكر.. هو احنا حددنا التوأم الغلط بعد الحادثة؟
ولو ده حصل..
يبقى الراجل اللي نايم جنبي مش أخوه
ويبقى جوزي اللي دفنته من 3 سنين.. ممكن يكون هو
كنت محتاجة دليل قبل ما أتهم حد بحاجة مستحيلة زي دي
وتاني يوم الصبح.. كنت عارفة هبدأ أدور فين
تاني يوم الصبح قمت قبل ما هو يصحى.. فضلت باصة عليه وهو نايم.. نفس الندبة باينة.. ونفس الوش اللي أنا حافظاه.. بس لأول مرة مبقتش عارفة أنا ببص على مين
مرضيتش أصحيه.. دخلت المطبخ وعملت قهوة وإيدي بتترعش.. وفتحت موبايلي وبدأت أدور في الصور القديمة
عندي ألبوم كامل لجوزي الأولاني من يوم فرحنا.. قلبت فيه لحد ما لقيت صورة ليه في البيت بالشورت.. وكان قاعد على الأرض وبنتي صغيرة قاعدة على رجله.. وعملت زووم.. الندبة باينة.. نفس المكان.. نفس التقويسة.. بالظبط
خدت سكرين شوت.. وبعدين دورت في صور أخوه.. أخوه كان عنده صور قديمة على الفيسبوك من أيام الجامعة وهو لابس مايوه في المصيف.. قلبت كتير.. ملقتش أي ندبة في المكان ده.. جسمه كان نضيف
قلبي بدأ يدق جامد
قلت لنفسي يمكن أنا ببالغ.. يمكن التوأم بيطلع لهم نفس الندبة لو الاتنين اتعوروا؟.. لا..