الطرد اللي انقذني حصري لموقع لمحه
شهور مدفعتوش الإيجار
أمي اتصدمت وقالت ازاي، جوزي كان بيقول انه بيدفع كل شهر
الراجل قال جوزك بقاله 4 شهور مبيجيش، وأنا كنت بعمل خاطر عشان العشرة بس خلاص مش هينفع
عرفنا ساعتها ان جوز أمي كان بياخد فلوس الإيجار اللي أمي بتديهاله من شغلها ويحطها في جيبه وميدهاش لصاحب البيت
كان بيقولها أنا بدفع وهو مش بيدفع
وصلنا 4 شهور متأخرين، يعني 8 آلاف جنيه مرة واحدة
أنا كان معايا 2000 جنيه من شغل السوبر ماركت وأمي كان معاها 1500
يعني كل اللي معانا 3500 ومطلوب 8 آلاف
صاحب البيت قال قدامكم أسبوع واحد بس وتدفعوا يا تمشوا
الليلة دي أمي منامتش
قعدت في المطبخ بتعيط وتقول بعد كل اللي استحملناه هنترمي في الشارع
قلت لها مش هنترمي ولا حاجة، أنا هتصرف
تاني يوم رحت الشغل وطلبت من المدير سلفة
قال مقدرش أديكي أكتر من ألفين
بقى معانا 5500 ولسه فاضل 2500
رحت لخالتي اللي ساكنة في آخر البلد
أول ما حكيت لها قالت أنا معيش فلوس يا بنتي، جوزك كان مبوظ سمعتكم في العيلة كلها ومحدش هيرضى يسلفكم
رجعت لأمي وأنا مكسورة
أمي قالت خلاص نلم هدومنا ونروح نقعد في أوضة فوق السطوح بتاعة جدتك لحد ما ربنا يفرجها
وفي الليلة اللي كنا بنلم فيها الهدوم، الباب خبط
فتحت لقيت واحدة ست كبيرة عمرها حوالي 60 سنة
قالت انتو بنت فلانة
قلت أيوه
قالت أنا كنت جارتكم من 13 سنة، أول ما أمك اتجوزت الراجل ده، فاكرة
أمي خرجت وقالت أيوه فاكراكي يا حاجة، ازيك
الست قالت أنا سمعت باللي حصل من الجيران، وسمعت انكم مزنوقين في الإيجار، بصي يا بنتي أنا ماليش عيال وجوزي ميت وعندي بيت صغير من أوضتين في آخر الشارع، البيت مقفول بقاله سنتين، خدوا المفتاح واقعدوا فيه ببلاش لحد ما تقفوا على رجليكم، لا عايزة إيجار ولا عايزة حاجة، اعتبروه بيتكم
أنا وأمي بصينا لبعض ومش مصدقين
أمي قالت ازاي ببلاش، مينفعش
الست قالت يا بنتي أنا شفتك وانتي صغيرة قد كده، وكنت بشوف جوز أمك وهو بيضربك في البلكونة وكنت بدعي لك كل يوم ان ربنا ينجيكي، ودلوقتي ربنا نجاكي، سيبوني أعمل حاجة تنفعني في آخرتي
خدنا المفتاح وتاني يوم نقلنا
البيت الصغير ده كان جنة بالنسبة لنا
أوضتين وصالة صغيرة ومطبخ وحمام، بس نضيف وريحته حلوة ومفيهوش ذكريات وحشة
مفيهوش صوت زعيق ولا ريحة سجاير ولا حد بيخبط الباب جامد
أول ليلة نمنا فيها أنا وأمي على مرتبة على الأرض حضنا بعض وقعدنا نعيط من الفرحة
أمي قالت شايفة يا بنتي، ربنا لما بيقفل باب بيفتح عشرة
بعد ما استقرينا، حصلت حاجة تانية
كنت في الشغل واحدة زبونة بتشتري من عندي كل يوم
في يوم قالت لي انتي شكلك شاطرة وبتتكلمي كويس، انتي بتدرسي
قلت لها نفسي أدخل كلية بس مفيش فلوس
قالت أنا عندي مكتبة صغيرة وبدور على بنت تمسكها بعد الضهر، المرتب 4000 جنيه في الشهر
4000 جنيه
أنا كنت باخد 2000 بس في السوبر ماركت
قلت لها موافقة طبعا
بقيت أشتغل الصبح في السوبر ماركت وبعد الضهر في المكتبة
بقى معانا فلوس، بقينا ناكل كويس ونشتري هدوم جديدة
والست صاحبة البيت كل يوم تيجي تقعد معانا شوية وتحكيلنا قصص
بقت زي جدتنا بالظبط
وفي يوم وأنا قاعدة في المكتبة دخل ولد شاب
قال لو سمحتي بدور على كتاب كذا
جبت له الكتاب
قال انتي جديدة هنا
قلت أيوه
فضل ييجي كل يوم يشتري كتاب شكل
وبعد شهر قال بصراحة أنا مش باجي عشان الكتب، أنا باجي عشانك
اتكسفت وقلت له لو سمحت أنا مش عايزة مشاكل
قال لا والله أنا مش بتاع مشاكل، أنا شفتك وشفت انك بنت جدعة وبتشتغلي شغلتين عشان تساعدى أمك، وأنا معجب بيكي وعايز أتقدملك لو تسمحي
قلت له أنا عندي 18 سنة ولسه بدري
قال أنا هستناكي
وحكيت لأمي
أمي قالت الواد ده شكله محترم، سيبيه ييجي يقعد معانا ونشوفه
جه وقعد معانا والست صاحبة البيت كانت قاعدة
اتكلم كويس وقال انه بيشتغل محاسب في شركة ومرتبه كويس وعايز يتجوز بنت حلال
أمي قالت له بنتى لسه صغيرة وعايزة تكمل تعليمها
قال أنا هساعدها تكمل تعليمها، وهخليها أحسن واحدة في الدنيا
النهاردة بقالنا 6 شهور في البيت الصغير
أنا دخلت معهد سنتين الصبح وبشتغل بعد الضهر
والولد ده لسه بييجي كل جمعة يزورنا ويجيب معاه فاكهة وحلويات
وأمي بقت تضحك من قلبها لأول مرة من 13 سنة
وجوز أمي سمعنا انه سافر بلد تانية وولاده كل واحد راح في حتة
والبيت الكبير اللي كنا ساكنين فيه اتباع وفلوسه راحت في الديون اللي عليه
وأنا كل ما أفتكر الليلة اللي أمي طردتني فيها
أفتكر انها كانت بتعيط أكتر مني
وان الطرد ده كان هو طوق النجاة اللي أنقذني من فضيحة كانت هتدمر حياتي كلها
أمي مطردتنيش
أمي حضنتني بأقسى طريقة ممكنة
طردتني عشان تحميني
